Преподобнаго отца нашего Иоанна Дамаскина

Отче Иоанне всемудре, церковь Христову уяснил еси песньми, божественнейшая сладкопоя, всеславне, действом, отче, Духа, твою цевницу ударяя, всесличней Давидове подобяся. Еюже возглашая, божественными песньми вся привлекл еси.

Отче Иоанне славне, мiрския отступль мятежныя молвы, ко Христове притекл еси тишине, преподобне, и видении божественными и деянии, всебогатыми яве светлостьми истинно обогатился еси, и верным преподал еси, боголепным сияя житием, блаженнейше.

Приидите, земнороднии, песньми священное и честное преподобнаго торжество Иоанна днесь благочестно воспоим: сей бо истинно божественнаго осияния сподобися свет прияти. О неизреченнаго твоего благоутробия, Господи, имже мы познахом славити Тя Преблагаго.

Преподобне отче, во всю землю изыде вещание исправлений твоих: тем на небесех обрел еси мзду трудов твоих, демонския погубил еси полки, и ангельския достигл еси чины, ихже житию непорочно поревновал еси. Дерзновение имея ко Христу Богу, мир испроси душам нашим.

Видящи Тя распинаема, Христе, Тебе Рождшая вопияше: что странное еже вижу таинство, Сыне Мой, како на древе умираеши, плотию повешен, жизни Подателю?

Православия наставниче, благочестия учителю и чистоты, вселенныя светильниче, монашествующих богодохновенное удобрение, Иоанне премудре, ученьми твоими вся просветил еси, цевнице духовная, моли Христа Бога, спастися душам нашим.

Ирмос: Во глубине постла:

Твоя похвалы начати хотящу ми, подаждь твой ныне глас медоточный, преподобне, имже православную уяснил еси Церковь песньми, отче Иоанне, яже твою почитает память.

Яко мудр и остроумен судия, изряднейше сущих естество смотряя, нестоящих предразсудил еси вечнующая: привременными бо изменил еси пребывающая, отче Иоанне, идеже тя и ныне Христос прослави.

Богородичен: Превышши явилася еси, Чистая, всякия твари, видимыя же и невидимыя, Приснодево: Зиждителя бо родила еси, якоже благоволи воплотитися во утробе Твоей: Егоже со дерзновением моли спасти поющия Тя.

Ирмос: Процвела есть:

Расточил еси богатство, Богу взаим дая: темже тебе на небесех уготовася Царство: но и ныне воздаяние, Иоанне, приял еси многократное.

Премудрости талант прием, деяньми украшая, уяснил еси, Иоанне, Церковь Христову: Егоже многоусугубляеши, и житие оставив.

Богородичен: Чини удивишася ангельстии, Пречистая, и человеческая устрашишася сердца о Рождестве Твоем. Темже Тя Богородицу верою чтим.

Труба богогласна освящена, священнейше, нам явился еси, песнопоюще образно учения Господа и Спаса концем, и твоими словесы мiр просветил еси, Иоанне преподобне, Христа Бога моли даровати нам велию милость.

Богородичен: Божественная скиния была еси Слова, едина пречистая Мати Дево, чистотою ангелы превозшедшая: паче всех мене персть бывша, осквернена плотскими прегрешеньми, очисти молитв твоих божественными водами, подающи, Чистая, велию милость.

Аще не поеши бдения, Крестобогородичен: Нескверная Агнице Слова, Нетленная Дево Мати, на Кресте зрящи повешена из Нея без болезни Прозябшаго, матерски подобно рыдающи, вопияше: увы Мне, Чадо Мое, како страждеши волею, хотя избавити от страстей безчестия человека?

Ирмос: Пришел еси:

Повелению Христову повинувся, оставил еси мiрскую красоту, богатство, сладость, светлость: егоже ради взем твой крест, последовал еси, Иоанне мудре.

Сообнищав обнищавшему Христу, человеческаго ради спасения, спрославился еси, якоже Той обещася, и сцарствуеши же Присноцарствующему, Иоанне.

Богородичен: Тя пристанище спасения, и стену необориму, Богородице Владычице, вси вернии вемы: Ты бо молитвами Твоими от бед избавляеши души наша.

Ирмос: Ходатай Богу и человеком:

Страхом Христовым, отче, утверждаемь к божественней жизни, плотское мудрование все покорил еси духу, твоя, Иоанне, чувства очищая.

Очистив всякия скверны тело и ум, и душу тщаливо, богомудре, зарю приял еси трисолнечную, Иоанне, светлыми тя богатящую даровании.

Богородичен: Моли Твоего Сына и Господа, Дево Чистая, плененным избавление от противнаго обстояния, на Тя надеющимся мирное даровати.

Ирмос: Во глубине греховней содержимь:

Просветився Духа благодатию, божественных и человеческих знанием вещей ясно обогатився, требующим, Иоанне, независтно преподал еси.

Подобне ликом небесным, мудре, Церковь православно украсил еси, ликостоянныя песни приглашая Троице боговещанныя.

Богородичен: Hеискусомужно, Дево, родила еси, и вечнуеши Дева, являющи истиннаго Божества Сына и Бога Твоего образы.

Песнописца и честнаго богоглагольника, Церкве наказателя и учителя, и врагов сопротивоборца Иоанна воспоим: оружие бо взем Крест Господень, всю отрази ересей прелесть, и яко теплый предстатель к Богу, всем подает прегрешений прощение.

Икос: Церковному наставнику и учителю и жерцу, яко таиннику неизглаголанных возопием согласно: иже к Богу твоими молитвами отверзи уста наша, и сподоби глаголати словеса учений твоих: ты бо Троице явился еси сопричастник, яко другое солнце облистая в мiре, чудесы и учении просияв, яко Моисей, в законе Господни поучаяся всегда, словом и делом был еси светильник, и моля непрестанно всем подати прегрешений прощение.

Ирмос: Богопротивное веление:

Ревностию разжигаемь, богоборных ересей всякое злоумие возразил еси светлыми писании, убелив всем ясно древле сеянная, мудрыми, о Иоанне, написанныя тонко.

Тепле обличил еси злоименных учеников Манента хульное нечестие, развратити покусившееся Церковь Христову, словесы и догматы твоими, о Иоанне, яже счинил еси.

Богородичен: Святых святейшую проразумеваем Тя, яко едину рождшую Бога непременнаго, Дево нескверная, Мати безневестная: всем бо источила еси верным нетление, божественным рождеством Твоим.

Ирмос: Пещь иногда огненная:

Обличил еси яве, треблаженне Иоанне, Hесториево разделение, Севирово слияние, единовольное пребезумие: веру же единодейственну, сияние православия всем облистав концем.

Всея враг плевелы обычно еретическия в Церкви Христове, сего поклонения отметатися во иконах честных, но обрете не дремающа тя, всеблаженне Иоанне, всякое семя злое искореняюща.

Богородичен: Ты от Отца Hеразлучнаго, во чреве богомужно Пожившаго, безсеменно зачала еси, и несказанно родила еси Богородительнице Пречистая: темже Тя спасение всех нас исповедаем.

Ирмос: Безначальна Родителя:

Hаучил еси вся церковныя пети сыны православно, Единицу в Троице Честную: воплощение же Слова Божественнаго богословити яве, Иоанне, уясняя неудобопостижная многим во священных Писаниих.

Святых чины песнословив, преподобне, Чистую Богородицу, Христова Предтечу, таже Апостолы, пророки с постники и мудрыя учители, праведники и мученики, в тех ныне водворяешися скиниих.

Богородичен: Чертог была еси, иже паче ума воплощения Слова, Дево Богородительнице, одеяна славою добродетелей и испещрена. Тем Тя, Всенепорочная, Богородицу возвещаем.

Яко Божествен свет, отче наш, Церкви возсиял еси пений твоих сию светлостию облистав, и светом нрава твоего, имже Христовы догматы являеши украшены, к Hемуже не престай о нас моляся, Иоанне.

Слава, и ныне, Богородичен: Воистинну Тя Богородицу исповедуем, Владычице, Тобою спасаемии: ибо Бога неизреченно родила еси разорившаго Крестом смерть, и к Себе привлекшаго преподобных соборы, с нимиже восхваляем Тя, Дево.

Монахов множества, наставника тя почитаем, отче наш Иоанне: твоею бо стезею воистинну право ходити познахом: блажен еси, Христу работав, и вражию обличил еси силу, Ангелом собеседниче, преподобных сопричастниче и праведных, с нимиже молися Господеви помиловатися душам нашим.

Не терплю, Чадо, видящи Тя, на Древе уснувша, бодрость всем подающаго, яко да иже древле преступления плодом сном погибельным уснувшим, Божественную и спасительную бодрость подаси, Дева глаголаше, плачущи, Юже величаем.