Месяца ноября в 30-й день.

Святаго и всехвальнаго апостола Андрея Первозваннаго

По предначинательном псалме поем: Блажен муж: 1-й антифон.

На Господи воззвах: стихиры на 8, глас 4.

Подобен: Званный свыше:

Иже Предтечевым светом воображен, егда озарение Vпостасное славы Отеческия явися, человеческий род за благоутробие спасти хотя, тогда первый ты, славне, к нему притекл еси, озарен быв в разуме совершеннейшею лучею Того Божества, отонудуже и проповедник и апостол быв Христа Бога нашего. Егоже моли спасти и просветити души наша.

Иже Предтечевым гласом оглашен, егда всесвятое Слово воплотися, жизнь нам подая и спасение, сущим на земли, благовествуя, тогда Тому, премудре, последовал еси, и себе крайнее и всесвятое, яко начаток, Тому освятил еси, Егоже и познав, и возвестил еси сроднику твоему Бога нашего. Егоже моли спасти и просветити души наша.

Иже из неплодове прозяшему ученик быв, егда Девственное Рождество возсия, благочестия учитель, и целомудрия показуя чистоту, тогда ты, теплейший добродетели рачитель, Андрее блаженне, был еси, восхождения в сердцы твоем полагая, и от славы к неизреченней взялся еси славе Христа Бога нашего. Егоже моли спасти и просветити души наша.

Слава, глас 4. Анатолия:

Рыб ловитву оставив, апостоле, человеки уловляеши тростию проповеди, низпущая, якоже уду, благочестия льщение и возводя из глубины лести языки вся, Андрее апостоле, верховнаго сый единокровный и вселенныя купно проповедниче велегласный, моляся не престай о нас, верою и любовию благохвалящих, всехвальне, присно честную память твою.

И ныне, предпразднства, глас тойже:

Исаие, ликуй, Слово Божие восприими, прорцы Отроковице Марии купину горети огнем и не сгарати зарею Божества. Вифлееме, благоукрасися, отверзи врата, Едеме, и волсви, идите, видети Спасение, в яслех повиваемое, Егоже звезда показа верху вертепа, жизнодавца Господа, спасающаго род наш.

Вход. Прокимен дне. И чтения 3.

На стиховне стихиры, глас 5.

Подобен: Радуйся:

Радуйся, словесное небо, славу Божию всегда поведающее, первый, Христа зовуща послушав тепле, и безотступно с Ним пребывая, от Негоже просвещаемь, увидел еси свет вторый, и сущия во тьме молниями твоими просветил еси, благости Того подражая. Тем всесвятое твое совершаем торжество, и мощей раку радостне целуем, от неяже источаеши спасение просящим и велию милость.

Стих: Во всю землю изыде вещание их, и в концы вселенныя глаголы их.

Первый добродетелей обретатель благоутробия ради нашим обложеннаго, Андрее Богомудре, естеством, совокупился еси Ему разжженною любовию, единокровному вопия: Егоже проповедаша пророцы в Дусе, обретохом, гряди к Его красоте, да привлечени будем и душею и помышлением, яко да световодствуеми Того светлостьми, нощь прелести и тьму неведения отженем, Христа благословяще, подающаго мiру велию милость.

Стих: Небеса поведают славу Божию, творение же руку Его возвещает твердь.

Языки, неведущия Бога, яко из глубины неведения уловил еси мрежею твоих словес, и возмущаеши яве сланая моря, конь храбрейший явился еси Владычествующаго морем, приснопеваемый, и гнилость безбожия изсушил еси, соль честную вложив, мудрость твою, ейже и удивишася, апостоле славне, обуявшей мудрости безстудне присвояющиеся, Христа не ведуще, подающаго мiру велию милость.

Слава, глас 3. Германово:

Скровника Петра и Христова ученика, рыб ловителя и ловца человеков, в песнех почтим, Андрея апостола, Иисусовым бо учением вся наказав догматы, и яко льщение рыбам плоти беззаконным предаде и тыя улови. Того молитвами, Христе, подаждь людем Твоим мир и велию милость.

И ныне, глас тойже:

Иосифе, рцы нам: како от святых, Юже приял еси Деву, непраздну приводиши в Вифлеем? Аз, глаголет, пророки испытав и ответ приим от Ангела, уверихся, яко Бога родит Мария несказанно, Егоже на поклонение волсви от восток приидут, с дары честными служаще. Воплотивыйся нас ради, Господи, слава Тебе.

Тропарь, глас 4:

Яко апостолов первозванный, и верховнаго сущий брат, Владыце всех, Андрее, молися, мир вселенней даровати и душам нашим велию милость.

Слава, и ныне, Богородичен воскресен.